हेटौंडा / मकवानपुरको बागमती गाउँपालिका वडा नं.५ सिक्रेदोभानमा पहिरोमा परी बेपत्ता भएकामध्ये आज बिहान दुई जनाको शव फेला परेको छ ।

मंगलबार बिहान वर्षासँगै आएको भल पहिरोले घर बगाउँदा बेपत्ता भएकामध्ये स्थानीय ६० वर्षीय अक्कलबहादुर स्याङ्तान र उनकी छोरी २२ वर्षीया शिला पहरीको शव फेला परेको मकवानपुरका प्रहरी नायव उपरीक्षक टेकबहादुर कार्कीले जानकारी दिए ।

प्रहरी नायव उपरीक्षक कार्कीका अनुसार, उनीहरुको सिन्धुली जिल्लाको हरिहरपुरगढी गाउँपालिका वडा नम्वर १ कोकरेस्थित बागमती नदीको बिच बगरमा शव फेला परेको हो ।

यससँगै उक्त पहिरोमा परेर मृत्यु हुनेको संख्या तीन पुगेको छ । यसअघि अक्कलबहादुरको श्रीमती सन्तमाया स्याङ्तानको मृत्यु भएको भएको थियो । पहिरोमा परेर बेपत्ता भएकी सन्तमायालाई उद्दार गरी उपचारको लागि स्थानीय मेडिकलमा लगिएको थियो । उनको सोही मेडिकलमा उपचारको क्रममा मृत्यु भएको थियो ।

पहिरोमा परेर बेपत्ता भएकामध्ये सिन्धुली हरिहरपुर गाउँपालिका वडा नं. १ कोकटी बस्ने १७ बर्षीय पासाङ घिसिङलाई भने मंगलबार साँझ जिवितै उद्धार गरिएको थियो । उनको हेटौंडा अस्पतालमा उपचार भइरहेको प्रहरी नायव उपरीक्षक कार्कीले बताए ।

यस्तै, सोही पहिरोमा परेर अझै तीन जना बेपत्ता रहेका छन् । बेपत्ता हुनेहरुमा मृतक अक्कलबहादुरको ज्वाई २५ वर्षीय जिबन पहरी, नाती ४ वर्षीय मिलन पहरी र नातिनी डेढ वर्षीय दिब्या पहरी रहेका छन् । प्रहरी र स्थानीयको सहयोगमा बेपत्ताहरूको खोजी कार्य भइरहेको उनले बताए ।