धनुषाको मिथिला नगरपालिका–६, ढल्केवरस्थित पूर्वपश्चिम राजमार्गमा मोटरसाइकल दुर्घटना हुँदा एक जनाको मृत्यु भएको छ भने अन्य चार जना घाइते भएका छन् । शनिबार मध्याह्न १२ बजे पूर्वबाट पश्चिमतर्फ गइरहेको बा ७९ प ४७५५ नम्बरको मोटरसाइकल र विपरीत दिशाबाट आइरहेको ज २ प ८३०१ नम्बरको मोटरसाइकल एकआपसमा ठोक्किएको हो ।

ठक्करबाट बा ७९ प ४७५५ नम्बरको मोटरसाइकलका चालक मिथिला नगरपालिका–१, लक्ष्मिनिवासका २८ वर्षीय राकेश राउतको मृत्यु भएको इलाका प्रहरी कार्यालय ढल्केवरले जानकारी दिएको छ । ठक्करबाट गम्भीर घाइते भएका राउतको जनकपुरस्थित काव्या अस्पतालमा उपचारको क्रममा मृत्यु भएको छ । सोही मोटरसाइकलको पछाडि सवार सोही ठाउँका अजितकुमार यादवको टाउको चोट लागेको छ । उहाँको उपचार भइरहेको छ ।

यसैगरी, ज २ प ८३०१ नम्बरको मोटरसाइकलमा सवार एक बालकसहित तीन जना घाइते भएका छन् । घाइते हुनुहुनेमा मिथिला नगरपालिका–६, ढल्केवरका ३८ वर्षीय अभय श्रेष्ठ, उहाँको श्रीमती ३२ वर्षीया मन्दिर श्रेष्ठ र १० वर्षीय छोरा आर्यन श्रेष्ठ हुनुहुन्छ । उहाँहरूको ढल्केवरस्थित भोगेन्द्र मेडिकलमा उपचार भइरहेको प्रहरीको भनाइ छ ।

ठक्करबाट दुवै मोटरसाइकलमा क्षति पुगेको छ । ती दुवै मोटरसाइकल इलाका प्रहरी कार्यालय ढल्केवरले नियन्त्रण राखेको छ ।