मकवानपुर प्रहरीले ८ किलोभन्दा बढी सुनसहित दुई जनालाई पक्राउ गरेको छ ।

शनिबार (आज) बिहान ३ बजेतिर हेटौँडा–१५, रातोमाटे चेकपोस्टमा ८ किलोभन्दा बढी सुनसहित दुई भारतीय नागरिकलाई पक्राउ गरिएको जिल्ला प्रहरी कार्यालय मकवानपुरले जनाएको छ ।

मकवानपुर प्रहरी प्रमुख प्रहरी उपरीक्षक विश्वराज खड्काका अनुसार, पूर्व-पश्चिम राजमार्गमा पथलैयाबाट हेटौँडातर्फ आउँदै गरेको बागमती प्रदेश ०२–०४७ प ७५०३ नम्बरको स्कुटरलाई रोकी जाँच गर्ने क्रममा भारतको महाराष्ट्र राज्य, सांगली जिल्ला, पुजारवाडीका २५ वर्षका अभिषेक अजिनाथ कुटी र राहुल भिट्टिहाल बाडलाई पक्राउ गरिएको हो । स्कुटर अभिषेकले चलाइरहेका थिए ।

सुन भन्सार छलेर अवैध तरिकाले भित्र्याएको हुन सक्ने प्रहरीको अनुमान छ । पक्राउ परेका दुवै जनालाई नियन्त्रणमा लिई थप अनुसन्धान तथा कारबाहीका लागि राजस्व अनुसन्धान कार्यालय, पथलैया बारा पठाउने तयारी भइरहेको मकवानपुर प्रहरीले जनाएको छ।