अज्ञात समुहको गोली प्रहारबाट मकवानपुरका एक प्रधानाध्यापक गम्भिर घाइते भएका छन् ।

आइतबार (आज) गोली प्रहारबाट मकवानपुरको बागमती गाउँपालिका–१, बोटगाउँ निवासी प्रधानाध्यापक प्रेम बहादुर बोम्जन गम्भिर घाइते भएका हुन् । सर्लाही र सिन्धुलीको सिमाना स्थित हरिहरपुरगढी गाउँपालिका–६, स्थित जंगलको बाटोमा अज्ञात समुहले प्रहार गरेको गोली बोम्जनको बायाँ बंगारा मुनी अड्किएको प्रहरीले जनाएको छ ।

जंगलमा लुटेराहरुले लुकेर गोली प्रहार गरेको बताइएको छ । घाइतेलाई तत्काल उद्धार गरी सर्लाहीको बागमती स्थित बागमती मोडल अस्पतालमा सामान्य उपचार पछि थप उपचारको लागि बारा रिफर गरिएको प्रहरीले जनाएको छ ।

बोम्जन रौतहटको गैयाटार स्थित आफन्तको घरबाट बागमती–झनझने सडक हुँदै ना ४० प ६६४६ नम्बरको मोटरसाइकलमा घर फर्कदै थिए । उक्त क्रममा ३-४ जनाको समुहमा रहेका अज्ञात समुहले आक्रमण गरेको प्रहरीको भनाई छ । उनी मकवानपुरको बकैया गाउँपालिका स्थित बुद्ध माध्यामिक विद्यालय हात्तीसुँडेका प्रधानाध्यापक हुन् ।

घटनाको विषयमा थप अनुसन्धान भइरहेको जिल्ला प्रहरी सिन्धुलीका प्रहरी प्रवक्ता प्रहरी नायव उपरीक्षक (डिएसपी) अनिल खड्काले जानकारी दिए ।