हेटौंडा / मकवानपुरको मनहरीमा प्रहरीले १० किलो २५० ग्राम लागु औषध गाँजासहित दुई जनालाई पक्राउ गरेको छ।

इलाका प्रहरी कार्यालय मनहरीबाट खटिएको प्रहरी टोलीले विशेष सूचनाको आधारमा मनहरी गाउँपालिका-९ भलाद्मीचोकस्थित पूर्व-पश्चिम राजमार्गमा जाँच गर्ने क्रममा उनीहरूलाई पक्राउ गरेको हो।

पक्राउ पर्नेहरूमा मनहरी-८ का २८ वर्षीय अटो चालक राम कुमार परियार र मनहरी-९ का ३६ वर्षीय रामकुमार स्याङबो रहेका छन्। मनहरीबाट हेटौंडातर्फ आउँदै गरेको ना १ ह ५०३३ नम्बरको अटोको सिट पछाडि कालो झोला र जेब्रा झोलाभित्र लुकाइछिपाइ राखिएको अवस्थामा उक्त गाँजा फेला परेको प्रहरीले जनाएको छ।

प्रहरीले लागु औषधसहित अटो र दुवै जनालाई नियन्त्रणमा लिई थप अनुसन्धान गरिरहेको छ।