हेटौंडा / मकवानपुरमा सुतिरहेको अवस्थामा सावेल प्रहारबाट एकजनाको मृत्यु भएको छ ।

मकवानपुरको मनहरी गाउँपालिका–६, प्रतापुर लच्का स्थित अम्मर बहादुर लोप्चनको घरमा गएराति १ बजेतिरको समयमा भएको कुटपिट तथा सावेल प्रहारबाट जित बहादुर मोक्तानको मृत्यु भएको मकवानपुर प्रहरीले जनाएको छ ।

प्रहरीका अनुसार, अम्मर बहादुर र जित बहादुर दुवै जना मजदुरी गर्ने साथी थिए। प्रायः एकै घरमा सुत्थे। गएराति जित बहादुर आफ्नै घरमा सुतिरहेको अवस्थामा अचानक अम्मर बहादुरले उनीमाथि कुटपिट सुरु गरेका थिए। कुटपिटबाट गम्भीर घाइते भएका जित बहादुरको शरीरको टाउको र दुबै खुट्टामा चोट लागेको थियो ।

घाइते जितबहादुरलाई उपचारका लागि भरतपुर सरकारी अस्पताल, चितवन पठाइएकोमा उपचारको क्रममा उनको मृत्यु भएको जिल्ला प्रहरी कार्यालय मकवानपुरका प्रहर प्रवक्ता प्रहरी नायव उपरीक्षक (डिएसपी) श्यामु अर्यालले जानकारी दिए। उनको शव चितवनस्थित सरकसरी अस्पतालमा राखिएको प्रवक्ता अर्यालले बताए ।

प्रहरीले कुटपिट गर्ने अम्मर बहादुरलाई नियन्त्रणमा लिई आवश्यक कारबाही प्रक्रिया सुरु गरेको जनाएको छ। घटनाबारे थप अनुसन्धान भैरहेको प्रहरीले जनाएको छ ।