मकवानपुरको हेटौंडा उपमहानगरपालिका–१५, चुरियामाईस्थित पूर्व–पश्चिम राजमार्गमा एक कन्टेनर लोड लहरी दुर्घटनामा परेको छ ।

बिहीबार (आज) बिहान १०ः३० बजेतिरको समयमा बिरगंजबाट काठमाडौं जाँदै गरेको मधेस प्रदेश०३–००१ ख ६७३८ नम्बरको मोबिल लोड गरिएको लहरी अनियन्त्रित भई सडकमा पल्टिएको हो ।

दुर्घटनामा लहरी चालक मकवानपुरको मनहरी गाउँपालिका–६ निवासी करिब ३० वर्षीय महेश मोक्तान घाइते भएका छन् । उनको दाहिने हातमा चोट लागेको मकवानपुर प्रहरी प्रवक्ता डिएसपी श्यामु अर्यालले जानकारी दिए । उनका अनुसार चालक मोक्तानको हेटौंडा अस्पताल उपचार भैरहेको छ ।

दुर्घटनापछि राजमार्गको दुबैतर्फ यातायात पूर्ण रूपमा अवरुद्ध भएको छ । घटनास्थलमा प्रहरी परिचालित भई क्रेनको सहायताले सडक खुलाउने प्रयास भइरहेको डिएसपी अर्यालले बताए । लहरी सडकमै पल्टिएका कारण यात्रुहरूलाई वैकल्पिक मार्ग प्रयोग गर्न मकवानपुर प्रहरीले सुझाव दिइएको छ ।

दुर्घटनाबारे थप अनुसन्धान भइरहेको प्रहरी प्रवक्ता अर्यालले बताए।