झापामा गएराति मोटरसाइकल दुर्घटना हुँदा दुई युवतीसहित तीन जनाको मृत्यु भएको छ ।

दुई छुट्टाछुट्टै स्थानमा भएका मोटरसाइकल दुर्घटनामा तीन जनाको मृत्यु भएको जिल्ला प्रहरी कार्यालय झापाले जनाएको छ । दुर्घटनामा दुईजना घाइते भएका छन् ।

दमक नगरपालिका-१० को सेतुमारी चोकबाट प्रदेश न १-०१-०१५ प १७९३ नम्बरको मोटरसाइकल आफैँ अनियन्त्रित भई दुर्घटना भएको जिल्ला प्रहरी कार्यालय झापाका डीएसपी कृष्णकुमार चन्दले जानकारी दिए ।

सो दुर्घटनामा मोटरसाइकल चालक मोरङको रतुवामाई नगरपालिका-८ घर भएका २७ वर्षीय बिराज थापा, मोटरसाइकलको पछाडि सवार झापाको गौरादह नगरपालिका- ५ कि ३२ वर्षीया जमुना धिमाल र सोही ठाउँ बस्ने २५ वर्षीया मनचरी भनिने ओमकुमारी राई घाइते भएका थिए ।

दमक अस्पतालमा उपचारको क्रममा दुवै महिलाको मृत्यु भएको प्रहरीले जनाएकोछ । दुर्घटनामा मोटरसाइकल चालक थापा पनि गम्भीर घाइते भएका छन् । उनलाई थप उपचारको लागि बीएण्डसी अस्पताल बिर्तामोड रेफर गरिएको छ ।

त्यसैगरी पूर्वपश्चिम राजमार्गअन्तर्गत शिवसताक्षीमा ट्याक्टरको पछाडि मोटरसाइकल ठोकिँदा एक जनाको मृत्यु भएको छ । शिवसताक्षी नगरपालिका-१० किरात चोकस्थि पूर्वपश्चिम राजमार्गमा रोकेर राखेको को २ त ४१४५ नम्बरको ट्रयाक्टरको पछाडि मे ९ प ६२४ नम्बरको मोटरसाइकल ठोकिँदा मोटरसाइकल चालक झापाकै मेचीनगर नगरपालिका -५ का ४२ वर्षीय सन्तोषकुमार लिम्बूको मृत्यु भएको हो ।

मोटरसाइकलको पछाडी सवार दमक नगरपालिका-५ की ३५ वर्षीया अनिता राई घाइते भएकी छन् । उनको बीएण्डसी अस्पताल बिर्तामोडमा उपचार भइरहेको छ । दुर्घटनापछि प्रहरीले ट्याक्टर चालकलाई पक्राउ गरेको छ ।