हेटौंडा  /  हेटौंडा उपमहानगरपालिका १५ नम्बर वडा खेलकुद विकास समितिको आयोजनामा अन्तर वडास्तरीय १५ नं. वडा अध्यक्ष कप फुटबल प्रतियोगिता २०८० को आयोजना हुने भएको छ।

सोनाम ल्होछारको अवसरमा आयोजना हुन लागेको उक्त प्रतियोगितामा हेटौंडाका १९ वटै वडाका टोलीले भाग लिन पाउँने छन् । चैत्र ९ देखि २२ गतेसम्म हेटौंडाको गौरीटार रंगशालामा प्रतियोगिता सञ्चालन हुने हेटौंडा उपमहानगरपालिका १५ नम्बर वडास्तरीय खेलकुद विकास समितिका अध्यक्ष गाेविन्द नेगीले जानकारी दिए ।

प्रतियोगितामा विजेता टोलीले १ लाख रुपैयाँ नगद पुरस्कार प्राप्त गर्नेछ भने उपविजेताले ५० हजार रुपैयाँ पाउनेछन्। विभिन्न विधामा उत्कृष्ट खेलाडीलाई समेत पुरस्कृत गरिने आयोजकले जनाएका छन्।

वडा स्तरबाट नै खेलाडी उत्पादन गर्ने उद्देश्यले प्रतियोगिता आयोजना गरिएको वडा नं. १५ का अध्यक्ष सुनिल मुत्तानले बताएका छन्।