मकवानपुर /  बागमती प्रदेशका प्रदेश प्रमुख दीपक प्रसाद देवकोटा र सुदूर पश्चिम प्रदेशका प्रदेश प्रमुख नजिर मियाँबीच शिष्टाचार भेटघाट भएको छ । 

आइतबार भएको भेटमा बागमती प्रदेशका प्रदेश प्रमुख देवकोटालाई सुदूरपश्चिम प्रदेशका प्रदेश प्रमुख मियाँले बधाइ तथा सफल कार्यकालको शुभकामना दिनु भएको छ । 

सुदूरपश्चिमका स्थायीवासी देवकोटालाई १४ साउनमा सङ्घीय सरकारको मन्त्री परिषदको बैठकले बागमती प्रदेशका प्रदेश प्रमुखको रुपमा सिफारिस गरेपछि वहाँले १७ साउनमा राष्ट्रपतिसमक्ष सपथ लिनुभएको थियो । लगतै १८ साउनमा बागमती प्रदेश कार्यालय हेटौंडामा एक समारोहबीच पदबहाल हुनुभएका देवकोटा आइतबार  गृहजिल्ला कैलाली पुग्नुभएको थियो । 

प्रदेश प्रमुख नियुक्त भएपछि पहिलो पटक गृह जिल्ला पुग्नु भएका देवकोटालाई  सुदूरपश्चिम प्रदेश प्रमुख कार्यालयका कर्मचारी तथा स्थानीयवासीहरूले समेत बधाइ दिएका थिए । 

सोही भेटमा प्रदेश प्रमुखहरू बीच दुई प्रदेशको समन्वय र सहकार्य तथा विकासका सन्दर्भमा छलफल समेत भएको थियो ।