हेटौंडा  / पर्सा राष्ट्रिय निकुञ्जअन्तर्गत नेपाली सेनाको सबुज गणको पोष्टमा पालेको हात्तीको आक्रमणबाट एक माउते घाइते भएका छन् ।

पर्सा राष्ट्रिय निकुञ्ज पर्ने मकमवानपुरको मनहरी गाउँपालिका–६ स्थित सबुज गणको पोष्टमा पालेको हात्तीलाई दाना खुवाउने क्रममा बुधबार (हिजो) अपराह्न ४ बजेतिरको समयमा सर्लाही हरिपुर नगरपालिका–९ निवासी २५ वर्षीय मनिष चौधरीलाई हात्तीले आक्रमण गरेको हो ।

माउते चौधरी हात्तीलाई दाना–पानी खुवाउँदै थिए। यही क्रममा हात्तीले सुडले प्रहार गर्दा उनको शरीर र कानमा चोट लागेको मकवानपुर प्रहरी प्रवक्ता प्रहरी नायव उपरीक्षक (डिएसपी) श्यामु अर्यालले जानकारी दिए ।  घाइते चौधरीलाई तत्काल चितवनको पुरानो मेडिकल कलेज, भरतपुरमा उपचारका लागि लगिएको थियो। उनको उपचार जारी रहेको छ प्रहरीले जनाएको छ ।

हात्तीलाई घटनास्थलमै बाँधेर राखिएको छ, र अन्य कुनै मानवीय क्षति नभएको निकुञ्ज स्रोतले जनाएको छ भने घटनाबारे थप अनुसन्धान भइरहेको प्रहरीले जनाएको छ ।